- ອາຊີບໄອທີດີຮ້າຍແນວໃດ ຕອນ 1
ເປັນເວລານເຫີງນານສົມຄວນ ທີ່ລຸງບໍ່ໄດ້ເຂົ້າມາຂຽນຢູ່ໃບລານ ເນື່ອງຈາກຫຍຸ້ງນໍາວຽກງານແລະຄອບຄົວ ອີກຢ່າງພວກລູກພວກຫລານ ດ່ຽວນີ້ກະບໍ່ຄອຍມີຜູ່ສົນໃຈນໍາເລື່ອງໄອທີ ຄືແຕ່ກ່ອນອີກແລ້ວ ຊາລຸງໄດ້ຍີນມາວ່າ ພວກຫນຸ່ມນ້ອຍລາວ ດຽວນີ້ນິຍົມກັນເປັນເທວະດາ ຊອກຮຽນແຕ່ວິຊາ ເສດຖະສາດ ບໍລິຫານ ການຄ້າທຸລະກິດ ແບບມືບໍ່ຖືກດີນ ແມ່ນແທ້ບໍ່?
ຄິດໄປແລ້ວມັນກະບໍ່ແມ່ນເລື່ອງແປກ ທີ່ສັງຄົມເຮົາມັນຍອມປ່ຽນໄປຕາມຍຸກສະໄຫມຂອງມັນ ຈະຮຽນວິຊາຫຍັງ ມີອາຊີບຫຍັງຖ້າເປັນສີ່ງທີ່ເຮົາມັກແລ້ວ ຈະເຮັດໃຫ້ເຮົາມີຄວາມສຸກກັບມັນ ແລ້ວຈະສົ່ງຜົນໃຫ້ວຽກງານນັ້ນກ້າວຫນ້າຂື້ນໄປເລື້ອຍໆ. ມື້ນີ້ລຸງຈະມາເລົ່າເລື່ອງ ໄອທີ ຂອງລຸງຕໍ່ ບາງທີ່ ບາງຄົນ ຫາກເຂົ້າໃຈເຖີງວິຖີຊີວິດທີ່ແທ້ຈີງ ຂອງອາຊີບນີ້ແລ້ວ ອາດປ່ຽນໃຈ ຈາກການຢາກເປັນເທວະດາ ມາເປັນຜູ່ສ້າງເທວະດາກໍ່ໄດ້
ໃນຍຸກສະໄຫມ ຕົ້ນປີ 1990 ຕອນ ໄອທີ ກໍາລັງມາແຮງ ໂດຍສະເພາະບັນດາປະເທດດ້ອຍພັດທະນາ ທັງຫລາຍ ບໍ່ວ່າຈະເປັນປະເທດອີນເດຍ ຈີນ ຫລືລາວເຮົາ ຖ້າໃຜໄດ້ຮຽນຫລືເຮັດວຽກກ່ຽວກັບ ໄອທີ ປັດຕິໂຖ ໂກ້ເກ ບໍ່ມີໃຜທຽບໄດ້ ຖ້າສາມາດຂຽນໂປຣກຼາມໄດ້ ແຮງຄັກ ຄົນນັບຖື ປານໄອສະຕາຍ ພຸ້ນໃດ໋. ເວົ້າແລ້ວຕອນລຸງຍັງຫນຸມນ້ອຍ ລຸງກະຄືນື່ງໃນນັ້ນ ທີ່ບ້າເທັກໂນໂລຊີ ຢາກຮູ້ຢາກເຫັນຢາກລອງ ຕາມພາສາເດັກນ້ອຍຄົນບ້ານນອກ ທີ່ມີຄວາມໄຟຟັນເກີນຂອບເຂດທົ່ງໄຮ່ທົ່ງນາ. ບໍ່ແມ່ນລຸງຢາກໂກ້ ຫລືບ້າເຮີໄປກັບສັງຄົມ ມັນອາດເປັນເພາະວາດສະຫນາ ຫລືຊາຕາ ທີ່ພາໃຫ້ລຸງໄດ້ກ້າວເດີນມາຕາມທາງເສັ້ນນີ້ ແລະມັນກໍ່ກາຍເປັນອາຊີບ ທີ່ຫາລ້ຽງຊີວິດແລະຄອບຄົວລຸງມາທຸກມື້ນີ້
ຄັ້ງນື່ງໃນຊີວິດ ລຸງມີໂອກາດທີ່ຈະເລືອກ ແລະເປັນການຕັດສີນໃຈຍາກທີ່ສຸດ ລຸງໄດ້ຮັບຈົດຫມາຍຕອບຮັບ ຈາກມະຫາວິທະຍາໄລ 4 ແຫ່ງພ້ອມກັນ ແລະມີ 5 ຂະແຫນງວິຊາອາຊີບທີ່ແຕກຕ່າງກັນ 1. ວິຊາສະຖາປະນິກ 2. ວິສະວະກອນກໍ່ສ້າງ 3. ວິສະວະກອນໄຟຟ້າ 4. ວິສະວະກອນກົນໄກເຄື່ອງມືຫຸ່ນຍົນ 5. ອຸປະກອນວິທະຍາສາດ ແລະ ໄອທີ. ຕອນນັ້ນລຸງມັກວິຊາສະຖາປະນິກ ອັນດັບນື່ງ ເພາະອາດີດເຄີຍຮຽນມາແດ່ແລ້ວ ແຕ່ຕ້ອງໃຊ້ເວລາເຖີງ 7 ປີ ເທົ່າກັບຮຽນຫມໍ ຈື່ງຈະປະກອບອາຊີບຫາຢູ່ຫາກີນໄດ້ ລຸງເລີຍຕັດສີນໃຈຮຽນເລື່ອງ ໄອທີ ທີ່ໃຊ້ເວລາພຽງ 4 ປີ ອີກຢ່າງເພາະຄວາມທໍລະນົງ ທີ່ເຄີຍມີ ລຸງຢາກພິສູດໃຫ້ຮູ້ວ່າ ຄົນທີ່ບໍ່ມີພື້ນຖານເລີຍໃນເລື່ອງນີ້ ຈະເຮັດໄດ້ຫລືບໍ່? ເຄີຍມີຄົນເວົ້າວ່າ ພວກນັກສີນລະປະສີນລະປີນ ບໍ່ສາມາດຮຽນເລື່ອງຄິດຄໍານວນໄດ້ດອກ ຄໍາເວົ້າງ່າຍໆຟັງແລ້ວເຈັບ ເຮັດໃຫ້ລຸງຢາກລອງພີສູດເບີ່ງວ່າ ມັນຈະຂະຫນາດໃດ ແລະນັ້ນແລະຄືການເລີ້ມຕົ້ນທາງເສັ້ນໃຫມ່ຂອງລຸງ.
ການທີ່ເຮົາວ່າໂຊກດີແລ້ວ ທີ່ມີໂອກາດໄດ້ເຂົ້າໄປນັ່ງຮຽນໃນມະຫາວິທະຍາໄລດີໆ ໃນຂະແຫນງທີ່ເຮົາມັກ ແຕ່ນັ້ນບໍ່ໄດ້ຫມາຍຄວາມວ່າ ທຸກຢ່າງຈະຮາບລື່ນໄປຕາມເນື້ອຜ້າ ຕອນນັ້ນລຸງລໍາບາກຫລາຍ ທັງຮຽນທັງຮັບຈ້າງຫາເງີນລ້ຽງຊີວິດໄປນໍາ ເວລາທີ່ມີໃຫ້ກັບການຮຽນ ແນ່ນອນບໍ່ເຕັມເມັດເຕັມຫນ່ວຍ ເຖີງແມ່ນຢູ່ປະເທດທີ່ພັດທະນາແລ້ວກໍ່ຕາມ ຍຸກນັ້ນຖ້າເວົ້າເຖີງອຸປະກອນເຄື່ອງມືທາງ ໄອທີ ເຊັ່ນຄອມພີວເຕີຣ ແມ່ນຍັງຍາກຢູ່ ແລະກໍ່ລາຄາແພງເຫລືອຮ້າຍ ຈື່ໄດ້ວ່າຢູ່ຫ້ອງແລບ ມີຄອມພີວເຕີຣປະມານ 60ເຄື່ອງ ຕໍ່ນັກຮຽນຂະແຫນງໄອທີ່ ຮ່ວມກັນທັງຫມົດເກືອບ 300 ຄົນ ທີ່ພັດປຽນກັນເຂົ້າໄປໃຊ້ຄອມພີວເຕີ ຊື່ງເຂົາຈະກໍາຫນົດເວລາໃຫ້ໃຊ້. ພວກຫລານຮູ້ບໍ່ວ່າການຂຽນໂປຣກຼາມ ມັນຕ້ອງໃຊ້ເວລາຢູ່ກັບຄອມ ເພື່ອລອງຜິດລອງຖູກ ຕັ້ງຫລາຍຮອບຈື່ງຈະອອກມາເປັນໂປຣກຼາມ ໃດນື່ງໄດ້ ຫລານຄົງຢາກຮູ້ແມ່ນບໍ່ວ່າລຸງຮຽນຂຽນໂປຣກຼາມ ໄດ້ແນວໃດ ໃນເມື່ອບໍ່ມີຄອມເພີວເຕີຣ. ລຸງຈະຂຽນໂຄງຮ່າງໃສ່ເຈັ້ຽກ່ອນ ບໍ່ວ່າຈະນັ່ງຢູ່ລົດໄຟ ລົດເມ ຕາມເສັ້ນທາງໄປຫາ ມລ ຫລືແມ່ນກະທັ້ງຢືນເຮັດວຽກຢູ່ໂຮງງານ ມືເຮັດວຽກໄປແຕ່ຫົວຄິດນໍາບົດຮຽນ ພໍຄິດອອກກໍ່ຂຽນລົງໃສ່ເຈັ້ຽໄວ້ ພໍເຖີງວັນເສົາອາທິດ ວັນທີ່ບໍ່ມີຄົນໃຊ້ຫ້ອງແລບຫລາຍປານໃດ ລຸງກໍ່ຈະໄປ ມລ ແຕ່ເຊົ້າ ແລ້ວພີມຈາກເຈັ້ຽລົງເຄື່ອງໃຫ້ໄວທີ່ສຸດ ຫລີ້ນກັບມັນ ຈົນເຖີງເວລາ ເຂົາໄລ່ອອກຈາກຫ້ອງແລບ.
ຕາມປະສົບການຂອງລຸງແລ້ວ ວິຊາໄອທີ ບໍ່ໄດ້ຍາກດັ່ງທີ່ເຮົາໄດ້ຍີນມາ ແຕ່ເປັນອາຊີບນື່ງທີ່ຕ້ອງໃຊ້ເວລາຢູ່ກັບມັນຫລາຍທີ່ສຸດ ໃນເມື່ອພັດທະນາການດ້ານນີ້ ຄືບຫນ້າໄປເລື້ອຍໆແລະໄວທີ່ສຸດ ຈໍາເປັນທີ່ນັກວິຊາການດ້ານນີ້ ຕ້ອງໄດ້ຕິດຕາມອັບເດດຄວາມຮູ້ ຢູ່ຕະຫລອດ ເວົ້າໄດ້ວ່າ ທຸກໆສອງປີ ພັດທະນາການຂື້ນເປັນສອງເທົ່າ ຢູ່ຕ່າງປະເທດ ຖ້ານັກຮຽນຂະແຫນງນີ້ຈົບອອກມາ ແລະບໍ່ສາມາດຫາງານໄດ້ພາຍໃນສອງປີ ແມ່ນຈົບເລື່ອງ ຕ້ອງໄດ້ເຂົ້າໄປຮໍ່າຮຽນຝຶກຝົນໃຫມ່ ອາດເປັນເພາະເຫດນີ້ຫລືບໍ່ ທີ່ເຮັດໃຫ້ຄົນຜີວຂາວ ຫລືພວກລູກເທວະດາ ບໍ່ສົນໃຈອາຊີບນີ້. ເພາະສາເຫດນີ້ລະທຸກມື້ນີ້ ເຮົາຈະເຫັນແຕ່ຄົນອີນເດຍ ທີ່ຍຶດຖືອາຊີບ ໄອທີ່ ເປັນສ່ວນໃຫຍ່ ອີກຢ່າງອາຊີບໄອທີ່ ບໍ່ຈໍາເປັນຕ້ອງລົງທືນຍັງຫລາຍ ຂໍໃຫ້ເປັນຄົນມີຄວາມອົດທົນ ມີເວລາພຽງພໍກັບມັນ ກໍ່ສາມາດຮຽນຮູ້ໄດ້ ແລະທຸກວັນນີ້ບໍ່ຈໍາເປັນຕ້ອງໄປນັ່ງ ຢູ່ໃນຫ້ອງຮຽນ ຫລືລຽນແຖວເຂົ້າຫ້ອງແລບຄືແຕ່ເກົ່າແລ້ວ ທຸກຄົນທີ່ຮູ້ພາສາອັງກິດ ພໍອ່ານອອກຂຽນໄດ້ ແມ່ນສາມາດຮຽນທາງອີນເຕີຣເນັດໄດ້.
ສີ່ງທີ່ລຸງເຫລົ່າມານີ້ ມັນເປັນພຽງສ່ວນລ່ວມນ້ອຍນື່ງຂອງ ອາຊີບໄອທີ ເທົ່ານັ້ນ ຄໍາວ່າ ໄອທີ ໃນໂຕມັນມີຫລາຍໆຂະແຫນງພາກສ່ວນ ແຍກອອກໄປຊື່ງນັກວິຊາການໄອທີຜູ້ນື່ງ ບໍ່ຫມາຍຄວາມວ່າຈະສາມາດຮູ້ ກ່ຽວກັບເລື່ອງໄອທີໄປຫມົດທຸກຢ່າງ ບໍ່ຕ່າງຫຍັງກັບຫມໍປົວໂລກຫົວໃຈ ບໍ່ແມ່ນຈະປົວແຂ້ວໄດ້. ໂອກາດຫນ້າຖ້າລຸງພໍມີເວລາ ແລະຫາກມີຜູ່ໃຫ້ຄວາມສົນໃຈຢູ່ ລຸງຈະມາຂຽນຕໍ່ ສໍາລັບມື້ນີ້ ລຸງຊິເຂົ້າໄປວຽງ ໄປເບີ່ງບຸນທາດຫລວງ ຫາຫມູ່ຫາຄູ່ກ່ອນ ແລ້ວຄ່ອຍພົບກັນໃຫມ່
- ອາຊີບໄອທີດີຮ້າຍແນວໃດ ຕອນ 2
ບົດທີ່ຜ່ານມາ ລຸງໄດ້ກ່າວເຖີງກາລະເວລາ ຍຸກຮິຕຂອງ ອາຊີບໄອທີ ແລະເລື່ອງລາວຫຍໍ້ໆການເດີນທາງເຂົ້າສູ່ ອາຊີບໄອທີ ຂອງລຸງ ສໍາລັບບົດນີ້ ລຸງຈະມາເວົ້າເລື່ອງ ຄວາມແຕກຕ່າງຫລາກຫລາຍ ແລະການເຮັດວຽກຂອງອາຊີບນີ້
ລຸງຍັງຈື່ໄດ້ເທົ່າທຸກມື້ນີ້ ກັບຄໍາຖາມຂອງຫມູ່ຄູ່ຄົນນື່ງ ທີ່ນາງເຄີຍທັກທາຍລຸງເມື່ອນານຫລາຍປີມາແລ້ວ ຕອນທີ່ລຸງກໍາລັງຮຽນຢູ່ປີທີ່ສາມ ແລະມີເຫດຕ້ອງກັບມາເມືອງລາວດ່ວນ ເພາະແມ່ຂອງລຸງ ເພີ່ນກໍາລັງປວຍຫນັກ ຫມູ່ນາງນີ້ຖາມລຸງວ່າ: (ທີ່ເຈົ້າໄປຮຽນຄອມເພີວເຕີຣນັ້ນ ແມ່ນຮຽນໃຊ້ຄອມພີວເຕີຣ ຫລືແປງຄອມກັນແທ້?) ລຸງເອັງເກືອບຫງາຍຫມາ ເພາະຄໍາຖາມແລະທ່າທີ່ ທີ່ນາງຖາມມານັ້ນ ມັນແຝງໄປດ້ວຍຄວາມຫມີນປະມາດ ນ້ອຍໆຢູ່ໃນນັ້ນ ອາດເປັນເພາະນາງຢາກອວດວ່າ ມີສາມີຣວຍ ເປັນນັກບັນຊີໃຫຍ່ມີຄວາມຮູ້ ກ່ຽວກັບໄອທີ ລະດັບອາຈານ ຫລືວ່າເປັນເພາະຄວາມຮັບຮູ້ນາງມີພຽງເທົ່ານັ້ນ ຈະແນວໃດກະຕາມ ລຸງຄິດວ່າ ຍັງມີອີກຫລາຍໆຄົນທີ່ບໍ່ທັນເຂົ້າໃຈໃນອາຊີບນີ້ ຊື່ງລຸງຖືວ່າມັນມີຄວາມສໍາຄັນ ທີ່ພວກລູກຫລານຄວນຮັບຮູ້ໄວ້ ໂດຍສະເພາະຜູ່ທີ່ກໍາລັງຈະຈົບ ຊັ້ນມັດທະຍົມ ແລ້ວຈະໄປຮຽນຕໍ່ສາຍອາຊີບຕ່າງໆ ຄວນສຶກສາທໍາຄວາມເຂົ້າໃຈ ກັບອາຊີບນັ້ນໆໃຫ້ດີສະກ່ອນ ຈື່ງຄອຍຕັດສີນໃຈເຂົ້າຮຽນ ບໍ່ດັ່ງນັ້ນຈະເສັຽທັງເງີນ ທັງເວລາ ຫລືເສັຽອະນາຄົດດ້ວຍຊໍ້າ.
ກ່ອນອື່ນຢ່າເບີ່ງ ອາຊີບ ໄອທີ ເປັນພຽງເລື່ອງໂກ້ ເງີນເດືອນຫລາຍ ໄດ້ນັ່ງໂຕະຕັ່ງ ເຮັດໃຫ້ເບີ່ງຄືສະຫລາດກ່ວາຜູ່ອື່ນໆ ຫລືເບີ່ງໃນດ້ານລົບ ເປັນອາຊີບ ຂອງຄົນບໍ່ມີສັງຄົມ ພວກຫນອນຫນັງສື ພວກແວ່ນຕາຫນາ ເຫງິກຫງາກ ອ່ອນແອບໍ່ມີແຟນ ສາລະພັດ. ດັ່ງທີ່ລຸງໄດ້ເວົ້າມາແລ້ວ ອາຊີບໃດກໍ່ຕາມ ຖ້າເຮົາມັກແມ່ນດີທັງນັ້ນ. ກ່ອນທີ່ເຮົາຈະເຂົ້າໃຈອາຊີບໄອທີໄດ້ລະອຽດ ກ່ອນອື່ນເຮົາຕ້ອງຮູ້ຈັກສາຂາ ພາກສ່ວນພະແນກ ການເຮັດວຽກຕ່າງໆ ຂອງ ວຽກໄອທີ ກ່ອນ ວ່າມີຫຍັງແດ່ ແລະແຕ່ລະພະແນກມີຫນ້າທີ່ເຮັດວຽກແນວໃດ ລຸງພໍຈະສະຫລຸບໄດ້ດັ່ງນີ້ ວຽກງານໄອທີ ໂດຍທົ່ວໄປແລ້ວປະກອບດ້ວຍ
1. ພະແນກບໍລິຫານປະສານງານ (Manager, coordinator, production supervisor)
2. ພະແນກວິເຄາະ (Network, database, programmer, security, system, quality assurance)
3. ພະແນກສ້າງ (developer or programmer)
4. ພະແນກທົດສອບ (Tester)
5. ພະແນກແນະນໍາບໍລິການ ແລະສອນ (Technician, supporter, operator, helpdesk)
ແຕ່ລະພະແນກພາກສ່ວນ ກະມີການແບ່ງຫນ້າທີ່ກັນອີກ ເຊັ່ນໂຕຢ່າງ ນັກວິເຄາະກ່ຽວກັບເນັດເວີກ ອາດບໍ່ຮູ້ເລື້ອງກ່ຽວກັບການສ້າງ ຫລື program coding ຫລືຜູ້ຊ່ຽວສານທາງດ້ານການສ້າງ ອາດບໍ່ຮູ້ຫລືບໍ່ສົນກັບລະບົບບໍ່ລິຫານ. ຢູ່ໃນບໍລິສັດໃຫຍ່ໆ ຫລືກະຊວງທີ່ມີພະແນກ ໄອທີ ສ່ວນຫລາຍແມ່ນມີການ ແບ່ງວຽກງານກັນຕາມ 5 ພາກສ່ວນດັ່ງຂ້າງເທີງນັ້ນ ແຕ່ສໍາລັບບໍລິສັດອົງກອນນ້ອຍໆ ແມ່ນບໍ່ຈໍາເປັນຕ້ອງມີຄົບຊຸດປານນັ້ນ ພະນັກງານໄອທີ ອາດມີພຽງຄົນຫລືສອງສາມຄົນເທົ່ານັ້ນ ກໍ່ພຽງພໍແລ້ວ ບໍ່ຊັ້ນເງີນຫມູນວຽນແມ່ນໄປຢູ່ນໍາ ໄອທີຫມົດ. ກ່ອນທີ່ຈະເວົ້າເຖີງຊີວິດ ລາຍໄດ້ລາຍດີ ຂອງມະນຸດໄອທີ ລຸງຈະເອີຍເຖີງຂັ້ນຕອນການເຮັດວຽກ ຂອງພະແນກ ໄອທີ ກ່ອນ ວ່າມັນເປັນແນວໃດ
ສົມມຸດວ່າ ທາງກະຊວງໃດນື່ງເພີ່ນມີໂຄງການ ທີ່ຕ້ອງການປັບປຸງລະບົບການເຮັດວຽກ ໃຫ້ມີປະສິດຖິຜົນຂື້ນ ລຸງຈະຈໍາລອງເຫດການ ໃສ່ກັບສະພາບບ້ານເມືອງເຮົາ ແບບໃຫ້ເຂົ້າໃຈງ່າຍໆ (ນີ້ຄືໂຕຢ່າງເທົ່ານັ້ນ)
ການສ້າງຊອບແວຣ ລະບົບຄວບຄຸມຄົນເຂົ້າເມືອງ ລະຫັດໂຄງການ ຄ.ຂ.ມ
- ທີ່ມາຂອງໂຄງການນີ້ (ສົມມຸດ): ຈາກກອງປະຂຸ່ມສະຫລຸບຜົນງານຂອງກະຊວງ ມີລາຍງານວ່າ ໄດ້ມີເຫດການລັກລອບເຂົ້າເມືອງ ແບບຜິດກົດຫມາຍເພີ້ມຂື້ນນັບມື້ ໂດຍທາງເຈົ້າຫນ້າທີ່ຕໍາຫລວດ ບໍ່ສາມາດຄວບຄຸມໄດ້ເຊັ່ນ ທ້າວ ສຽວຫົວ ພໍ່ຄ້າຊາວຈີນ ຖືກຈັບໄດ້ວ່າຄ້າມະນຸດຂ້າມຊາດ ທາງການໄດ້ທໍາການປັບໄຫມ ແລະສົ່ງໂຕອອກນອກປະເທດແລ້ວ ແຕ່ບໍ່ຮອດເດືອນຊໍ້າ ບັກຜີເພດນີ້ຍັງມານັ່ງດືມເບຍລາວຢູ່ແຄມຂອງໄດ້ຢູ່ ໂດຍໃຊ້ບັດຜ່ານແດນໃຫມ່ ໃນນາມວ່າ ທ້າວ ສຽວຫາງ ລາຍງານນີ້ ສ້າງຄວາມບໍ່ພໍໃຈຫນັກໃຫ້ທ່ານລັດຖະມົນຕີ ເຖີງຂັ້ນຕົບໂຕະໃສ່ຫົວຫນ້າກົມວ່າ ນີ້ມັນແຜ່ນດີນລາວ ຊາດໃດມັນຈະມາຫຍຽບຫຍາມ ຂົ່ມເຮັງຄົນລາວບໍ່ໄດ້ເດັດຂາດ ນີ້ຄືຄໍາສັ່ງຫມົດເທົ່າໃດກະຊ່າງ ເຮັດແນວໃດກະໄດ້ ຕ້ອງຫາທາງແກ້ໄຂເລື່ອງນີ້ໃຫ້ໄດ້ ແລະໄວທີ່ສຸດກ່ອນທີ່ທຸກຢ່າງຈະສວຍເກີນແກ້
ວັນຕໍ່ມາທາງກົມຮ້ອງປະຊຸມດວນ ລະດົມຄວາມຄິດຈາກ ພງ ຊ່ຽວຊານ ລະດັບຊຽນທັງຫລາຍ ເພື່ອຫາທາງແກ້ໄຂ ຜູ່ຊຊ ບາງຄົນ ອາດສະເຫນີໃຫ້ເພີ້ມຈໍານວນ ຕໍາຫລວດຊາຍແດນຂື້ນ ບາງຄົນອາດສະເຫນີໃຫ້ ເພີ້ມມາດຕະການປັບໄຫມ ເພີ້ມຂື້ນອີກ ບາງຄົນສະເຫນີໃຫ້ຊື້ລົດລຸ້ນໃຫມ່ ຈະໄດ້ແລນໄລ່ຈັບໂຈນໄດ້ທັນ ພໍດີທ້າວ ກ ພງ ຫນູ່ມນ້ອຍດ້ອຍປະສົບການ ຫາກໍ່ສັງກັດໃຫມ່ ຍົກມືຂື້ນ ທ່ານທັງຫລາຍ ຖ້າເຮົາປັບປຸງລະບົບກວດຄົນເຂົາເມືອງ ໃຫ້ມີປະສິດຖິພາບ ວ່ອງໄວ ແລະທັນສະໄຫມຂື້ນຈະບໍ່ດີກ່ວາບໍ່? ທ່ານຫົວຫນ້າກົມຫລຽວເບີ່ງດ້ວຍຄວາມສົງໃສ ແລ້ວຖາມວ່າ ເຮັດແບບໃດທ້າວ?
ທ້າວ ກ ຕອບວ່າ: ຂ້ານ້ອຍກະບໍ່ຮູ້ ແຕ່ເຄີຍເຫັນຜ່ານຕາ ໃນຫນັງບູ້ ອາເມຣິກາ ຄືວ່າມີຮອດລະບົບນັ້ນນີ້ ສາມາດກວດຈັບໂຈນໄດ້ ດ້ວຍລະບົບຄອມພີວເຕີຣ ຖ້າເຮັດໄດ້ແນວນັ້ນຄືຊິຄັກ
ຊຊ ອາວຸໂສ ເງີນເດືອນຫລາຍ ຄົນນື່ງຊວນຂື້ນ: ບັກຫລ້າ ນັ້ນມັນໃນຫນັງ ເຂົາເຮັດຂື້ນເພື່ອຫລອກໃຫ້ຄົນເບີ່ງຊື່ໆ
ທ່ານ ຫົວຫນ້າກົມ: ທຸກຄົນເວົ້າມີເຫດຜົນ ເອົາແບບນີ້ ໃຫ້ພວກເຈົ້າໄປຂຽນໂຄງຮ່າງ ຂັ້ນຕອນລາຍລະອຽດມາ ພ້ອມທັງປະເມີນລາຄາມາດ້ວຍ ພິເສດ ທ້າວ ກ ຄວາມຄິດເຈົ້າແປກໃຫມ່ ບໍ່ເຄີຍໄດ້ຍີນມາໃນຊີວິດການເຮັດວຽກຂ້ອຍ ໃຫ້ເຈົ້າໄປສຶກສາ ແລ້ວສະຫລຸບເປັນລາຍລັກອັກສອນ ມາໃຫ້ຂ້ອຍ, ນີ້ມັນຈະ 4 ໂມງແລ້ວ ຂ້ອຍມີນັດຕີກອຟ ກັບທ່ານ ຣຕ ປິດປະຊຸມ.
- ອາຊີບໄອທີດີຮ້າຍແນວໃດ ຕອນ 3
ໃນບົດທີ່ 2 ລຸງໄດ້ເວົ້າເຖີງພາກສ່ວນຫນ້າທີ່ ທີ່ແຕກຕ່າງຂອງອາຊີບ ໄອທີ ແລະໄດ້ຍົກໂຕຢ່າງ ການກໍ່ເກີດ ໂຄງການສ້າງຊອບແວຣໃດນື່ງ ໂດຍສົມທຽບກັບເຫດການໃນບ້ານເຮົາ ເພື່ອໃຫ້ເຂົ້າໃຈງ່າຍຂື້ນ ສ່ວນບົດນີ້ ລຸງຈະເວົ້າເຖີງຂັ້ນຕອນ ຂອງການສ້າງຊອບແວຣ ໂຄງການ ຄ.ຂ.ມ ວ່າຈະດໍາເນີນໄປແນວໃດ
ໂດຍທໍາມະຊາດແລ້ວ ໂຄງການສ້າງຊອບແວຣ ລະດັບໃຫຍ່ໆໃດນື່ງ ບໍ່ແມ່ນຈະເກີດຂື້ນໄດ້ງ່າຍດາຍ ຄືຍົກໂຕຢ່າງມານີ້ ຕາມທີ່ເຄີຍໄດ້ຍີນມາ ບາງໂຄງການໃຊ້ເວລາຄົ້ນຄ້ວາ ສໍາຫລວດຢູ່ຫລາຍປີ ສຸດທ້າຍກະເລີກລົ້ມ ບາງໂຄງການເລີ້ມສ້າງແລ້ວເກີນກ່ວາເຄີງນື່ງ ຍັງຍົກເລີກໄດ້ ເພາະເຕັກໂນໂລຊີ ຫລ້າສະໄຫມ ຫລືວົງການທຸລະກິດ ມີການປ່ຽນແປງ.
ລຸງຈະບໍ່ໂມ້ໃຫ້ອອກນອກເລື້ອງ ຈະເລີ້ມເຂົ້າໂຄງການ ຄ.ຂ.ມ ເຮົາເລີຍ ສົມມຸດວ່າໂຄງການນີ້ ໄດ້ຜ່ານການເຫັນດີເຫັນຊອບ ຈາກຂັ້ນເທີງແລ້ວ ຂັ້ນຕອນທໍາອິດ ເພີ່ນກໍ່ຄົງຈັດຕັ້ງທີມງານໂຄງການ ຄ.ຂ.ມ ຂື້ນ ໃນນັ້ນຄົງປະກອບດ້ວຍ ຫລາຍໆຜູ່ຊ່ຽວຊານທາງດ້ານ ກົດຫມາຍ, ສະຖິຕິ, ຕໍາຫລວດ, ການເງີນ, ນັກເຕັກນິກ.... ເພື່ອປະສານງານກັນ ເຂົ້າຫ້ອງປະຊຸມບໍ່ຮູ້ວ່າຈັກເທື່ອ ຈົນໄດ້ເອກກະສານສະບັບນື່ງ ທີ່ລະບຸເຖີງຄວາມຕ້ອງການ ຂອງໂຄງການ (Project requirement specification) ຊື່ງເອກກະສານສະບັບນີ້ ປຽບເຫມືອນ ພີມຂຽວ ທີ່ໃຊ້ໃນການປະມູນໂຄງການກໍ່ສ້າງ ແຕ່ໃນນີ້ແມ່ນເພື່ອປະມູນໂຄງການ ໄອທີ
ໂຕຢ່າງ ປະເດັນຫລັກ ຂອງເອກກະສານ:
- ລະບົບ ຄຂມ ຕ້ອງສາມາດລາຍງານໃຫ້ເຈົ້າຫນ້າທີ່ໄດ້ ຖ້າມີຜູ້ປອມແປງເອກະສານ ໃບຫນ້າ ຫລືຖືອາວຸດ ເຂົ້າປະເທດ
- ລະບົບ ຕ້ອງເປັນແບບເນັດເວີກສະເພາະ ສາມາດເຊື່ອມໂຍງຂໍ້ມູນ ກັບຖານຂໍ້ມູນຂອງກົມຕໍາຫລວດໄດ້
- ການກວດຄົນເຂົ້າອອກປະເທດ ຕ້ອງປະຕິບັດໄດ້ຢ່າງວອງໄວ ບໍ່ໃຫ້ມີການຕໍ່ແຖວເກີນກ່ວາ 30 ນາທີ່
- ລະບົບ ຕ້ອງມີການຮັກສາຄວາມປອດໄພ ຢ່າງຫນ້າແຫ້ນ ແລະມີລະບົບສໍາລອງ (Backup system) ກໍລະນີສຸກເສີນ
................
ເມື່ອບໍລິສັດໄອທີ ໃດນື່ງ ທີ່ໄດ້ໂຄງການນີ້ໄປ
ຂັ້ນທໍາອິດ ເຂົາຈະໃຫ້ທີມງານ ນັກວິເຄາະ (Business Analyst ຫລື B.A) ເອົາໂຄງການໄປວິເຄາະ ແຍກອອກເປັນລາຍລະອຽດ ເພື່ອສ້າງເປັນເອກກະສານທາງດ້ານວິເຄາະ (Functional Specification) ກ່ອນຈະໄດ້ເອກກະສານສະບັບນີ້ ບໍ່ແມ່ນຂອງງ່າຍຄືກັນ ຕ້ອງມີການປະຊຸມກັນຫລາຍເທື່ອ ຕ້ອງໄດ້ຖາມຄວາມຄິດເຫັນ ຈາກຜູ່ຊ່ຽວຊານ ສະເພາະ ໃນດ້ານການກວດຄົນເຂົ້າເມືອງ ແລະຫົວຫນ້າທີມງານສ້າງ (developer ຫລື programmer) ເຖີງຄວາມເປັນໄປໄດ້ຫລືບໍ່ ຮ່ວມທັງພາກສ່ວນ ອຸປະກອນໄຮເທັກ ຕ່າງໆ ວ່າຈະມີການຕິດຕັ້ງ ເຊື່ອມໂຍງເຂົ້າກັບຊອບແວຣໄດ້ແນວໃດ.
ໂຕຢ່າງ ປະເດັນຫລັກ ຂອງເອກກະສານ:
- ພາກສ່ວນກວດກາເອກກະສານ ຕ້ອງມີລະບົບສະແກນໃບຜ່ານແດນ ແລະຂໍ້ມູນສາມາດສົ່ງຜ່ານ ເຂົ້າໄປກວດສອບປະຫວັດໃນລະບົບ ຂອງກົມຕໍາລວດ ໄດ້ທັນທີທັນໃດ ...
- ພາກສ່ວນກວດກາຮູບຮ່າງໃບຫນ້າ ເຄື່ອງກວດສອບໃບຫນ້າ ກ້ອງຕ້ອງຕິດຕັ້ງຢູ່ຫລາຍມູມ ມີການເກັບຂໍ້ມູນໄວ້ ...
- ເຕັກໂນໂລຊີແລະອຸປະກອນ ທີ່ຈະໃຊ້ໃນການສ້າງ ຕ້ອງເປັນລຸ້ນໃຫມ່ ຂອງບໍລິສັດ ...
- ລະບົບເນັດເວີກ ຕ້ອງໃຊ້ສັນຍານດາວທຽມ ຂອງ ....
ຂັ້ນຕອນທີ່ສອງ ເມື່ອຜ່ານການວິເຄາະຕົກລົງກັນແລ້ວ ທີມງານການສ້າງ ອັນປະກອບດ້ວຍ ຜູ່ຊໍານານເລື່ອງສ້າງຊອບແວຣ ຖານຂໍ້ມູນ Database ນັກຂຽນໂປຣກຣາມ Analyst Programmer ກໍ່ຈະປະຊຸມກັນເພື່ອວາງແຜນງານ ອອກແບບ ທາງດ້ານເຕັກນິກ ໂດຍສ່ວນໃຫຍ່ແລ້ວ ຈະປະກອບເອກະສານ ລາຍລະອຽດທາງດ້ານເຕັກນິກ (Technical Specification) ແລະສ້າງຮູບຈໍາລອງ (Prototypes) ກ່ອນທີ່ຈະລົງມືສ້າງໂຕຈີງ ເອກກະສານທາງເຕັກນິກນີ້ ມີຄວາມສໍາຄັນ ແລະປະໂຫຽດ ສໍາລັບບໍລິສັດສ້າງຊອບແວຣ ໃຫຍ່ໆ ເພື່ອບັນທຶກຂັ້ນຕອນແລະເຕັກນິກໃນການສ້າງ ກໍລະນີມີຄວາມຜິດພາດ ຫລືສໍາຫລວດຄືນ ອີກຢ່າງຢູ່ໃນວົງການ ໄອທີ ມັກມີການປ່ຽນວຽກຢູ່ເລື້ອຍໆ ເມື່ອມີພະນັກງານໃຫມ່ເຂົ້າມາ ເອກກະສານນີ້ຈະຊ່ອຍໃຫ້ ສາມາດຮຽນຮູ້ລະບົບໄດ້ໄວຂື້ນ.
ໂຕຢ່າງ ປະເດັນຫລັກ ຂອງເອກກະສານ:
- ການອອກແບຖານຂໍ້ມູນ ເພື່ອໃຫ້ເຮັດວຽກໄດ້ວ່ອງໄວ ແລະສາມາດ ຂະຫຍາຍການນໍາໃຊ້ອອກໄປໄດ້ໃນອານາຄົດ ໄດ້ອອກແບບໃຫ້ເປັນສອງພາກສ່ວນ ສໍາລັບພາກພື້ນສະຫນາມ ແລະ ສູນກາງ ມີການເຊື່ອມໂຍງຂໍ້ມູນກັນທຸກໆ 5 ນາທີ່ ປະກອບດ້ວຍ99 ຕາຕະລາງ ຂໍ້ມູນຫລັກເປັນພາສາລາວ ແລະສາມາດແປ ເປັນພາສາອື່ນໄດ້ ໃນກໍລະນີຕ້ອງການແລກປ່ຽນຂໍ້ມູນ ກັບປະເທດອື່ນໆ
- ລະບົບລາຍງານ ມີພຽງພງສະເພາະ ພິເສດເທົ່ານັ້ນ ທີ່ສາມາດເຂົ້າລະບົບໄດ້
ຂັ້ນຕອນທີ່ສາມ ຄືການລົງມືສ້າງໂຕຈີງ ໃນຂັ້ນຕອນນີ້ຖ້າເປັນລະບົບໃຫຍ່ ເຂົາຈະແບ່ງວຽກອອກເປັນສ່ວນໆ (Phase) ມີໄລຍະກໍາຫນົດເວລາ ທີ່ຈະຕ້ອງເຮັດໃຫ້ແລ້ວ ເມື່ອເຟດສ ທໍາອິດແລ້ວ ກໍ່ຈະໂອນໄປໃຫ້ທີມກວດສອບ (Test team) ທົດລອງຫາຈຸດບົກຜອງ ຖ້າພົບຄວາມຜິດ ຫລືບໍ່ຖືກຕາມສະເປກ ທີ່ກໍາຫນົດໄວ້ ວຽກກໍ່ຈະກັບຄືນມາຫາທີມສ້າງອີກ ມີບາງເທື່ອວຽກອາດຕ້ອງກັບຄືນໄປຫາ ທີມວິເຄາະ ເພື່ອຫາທາງແກ້ໄຂຄືນໃຫມ່ ຫລືອາດຈະຕ້ອງນັ່ງໂຕະ ຕົກລົງກັບເຈົ້າຂອງໂຄງການຄືນໃຫມ່ເພື່ອແກ້ໄຂ ໃນບາງສ່ວນ.
ຂັ້ນຕອນທີ່ສີ່ ຄືຂັ້ນຕອນສຸດທ້າຍ ຄືການຕິດຕັ້ງ ເພື່ອທົດສອບໂຕຈີງ, ມີການຝຶກອົບຮົມ ແລະ ຫມອບຮັບໂຄງການ ກ່ອນທີ່ຈະມີລໍາວົງຮອບພິເສດເກີດຂື້ນ ໂຊກດີທີ່ ໂຄງການ ຄຂມ ຂອງເຮົາຜ່ານໄປໄດ້ດ້ວຍດີ ໂຄງການຂອງຄົນລາວ ສ້າງໂດຍຄົນລາວ ໃຊ້ໂດຍຄົນລາວ ເວົ້າວ່າກັນໄດ້ ທຸກຢ່າງສໍາເລັດຕາມເປົ້າຫມາຍ ຫມົດໄປເທົ່າໃດລ້ານ ລຸງກະບໍ່ຮູ້ນໍາ ແຕ່ລຸງຄົງດີໃຈບໍ່ນ້ອຍ ຫາກຄົນລາວເຮົາ ເຮັດໄດ້ປານນັ້ນ ໂດຍບໍ່ອາໃສໄມ້ມືລາຄາແພງ ຈາກຕ່າງປະເທດ.
- ອາຊີບໄອທີດີຮ້າຍແນວໃດ ຕອນ 4
ໃນບົດທີ່ແລ້ວ ລຸງໄດ້ເວົ້າເຖີງຂັ້ນຕອນ ການເຮັດວຽກຂອງມະນຸດໄອທີ ໃນໂຄງການສ້າງຊອບແວຣ໌ໃດນື່ງ ແບບລ່ວມໆໃຫ້ພໍເຂົ້າໃຈພໍຫອມປາກຫອມຄໍ ສ່ວນບົດນີ້ ລຸງຈະມາເວົ້າເຖີງບຸກຄົນ ຜູ່ທີ່ຈະຍຶດຖືອາຊີບນີ້ໄດ້ ຮ່ວມໄປເຖີງສີ່ງທີ່ດີບໍ່ດີຂອງອາຊີບນີ້ ແລະຖ້າເກີດວ່າມັກ ຢາກຮຽນຮູ້ຄວນຈະເລີ້ມຕົ້ນແນວໃດ ຮ່ວມທັງຟັງນິທານນ້ອຍໄປນໍາ.
ຕອນສະໄຫມທີ່ລຸງຮຽນຈົບ ຈາກມະຫາວິທະຍາໄລ ໃຫມ່ໆ ໄດ້ມີໂອກາດເຂົ້າຝຶກງານໃນບໍລິສັດແຫ່ງນື່ງ ນັກຮຽນທີ່ຈົບພ້ອມກັນໃນຮຸ້ນມີປະມານ 40 ຄົນ ສໍາຫລັບສົກຮຽນປີນັ້ນ ມີພຽງ17ຄົນເທົ່ານັ້ນ ທີ່ມີໂອກາດໄດ້ເຂົ້າຝຶກງານ ອາດເປັນເພາະມັນຖືກຊ່ວງ ວິກິດການທາງເສດຖະກິດຂອງປະເທດເຂົາ ກໍ່ເປັນໄດ້. ເປັນເລື່ອງທໍາມະດາ ທີ່ເດັກນ້ອຍບ້ານນອກ ຈາກປະເທດທີ່ດ້ອຍພັດທະນາຄືລຸງ ໄດ້ມີໂອກາດມາເຖີງຂັ້ນນີ້ ຄວາມດີໃຈຫາຫຍັງປຽບບໍ່ໄດ້ ທີ່ຈະໄດ້ຜູກກະລະວັດ ໃສ່ສູດ ຫີ້ວກະເປົາໄປນັ່ງໂຕະນັ່ງຕັ່ງເຮັດວຽກ ປານພະເອກຢູ່ໃນຫນັງ.
ອະນິຈາ ຊີວິດມັນບໍ່ໄດ້ງົດງາມຄືແນວນັ້ນ ມື້ທໍາອິດຂອງອາຊີບໄອທີ ເຂົາໃຫ້ລຸງຮັບຜິດຊອບປ່ຽນເຈັ້ຽພຣີນເຕີຣ ທໍາຄວາມສາອາດແປ້ນພີມ ເມົາສ໌ ບາງເທື່ອຕ້ອງໄດ້ຄານລົງກ້ອງໂຕະ ໄປຕໍ່ສາຍໄຟສາຍເຄເບີຣ ຊື່ງມັນບໍ່ຕ່າງຫຍັງກັບອາຊີບກໍາມະກອນທົ່ວໄປ. ເຈັບໃຈແລະເຫລືອໃຈ ທີ່ຮຽນມາດ້ວຍຄວາມລໍາບາກ ແລ້ວຕ້ອງມາເຮັດວຽກແບບນີ້ ອົດທົນເຮັດວຽກດັງກ່າວ ໄດ້ຕັ້ງສອງອາທິດ ບໍ່ຮູ້ຊິລະບາຍຄວາມຮູ້ສຶກແນວໃດດີ ລຸງເລີຍໂທຣໄປລະບາຍກັບຫມູ່ ຜູ່ທີ່ວ່າໂຊກດີທີ່ສຸດ ທີ່ໄດ້ເຂົ້າຝຶກງານກັບບໍລິສັດຍັກໃຫຍ່ IBM. ແທ່ນທີ່ຫມູ່ເຂົາຊິເຍາະເຍີຍ ກັບຕອບມາວ່າ ກູກະບໍ່ຕ່າງຫຍັງດອກ ເຂົາໃຫ້ຢືນແພກຄອມພີວເຕີຣ ໃສ່ແກັດ ຕິດສະຕິກເກີຣ ຫມົດມື້. ຮ້ວຍຖ້າອາຊີບໄອທີເປັນແນວນີ້ ຈັກຊິຮຽນມາເຮັດຫຍັງ ວຽກແບບນີ້ ຕາສີຕາສາ ກະເຮັດໄດ້
ລຸງອົດທົນປ່ຽນເຈັ້ຽພຣີນເຕີຣ ຢູ່ໄດ້ນື່ງເດືອນຈົນຮູ້ວ່າໃຜເປັນໃຜໃນບໍລິສັດແລ້ວ ລຸງຕັດສີນໃຈເຂົ້າຫາຫົວຫນ້າເລີຍ ແລະບອກວ່າຢາກເຮັດວຽກທີ່ມັນກ່ຽວຄ້ອງກັບໄອທີ ທີ່ມັນທ້າທາຍກ່ວານີ້ ຫົວຫນ້າມັນເລີຍຖາມລຸງວ່າ ຂຽນໂປຼກຣາມຫຍັງໄດ້ບໍ່ ແລະລອງເອົາວຽກນ້ອຍໆ ໃຫ້ທົດລອງເຮັດ ຈື່ໄດ້ວ່າເປັນໂປຼກຣາມກ່ຽວກັບລະບົບອີ່ເມວ ເຂົາໃຫ້ເວລານື່ງເດືອນ ແຕ່ເພາະຄວາມຕື່ນເຕັ້ນ ແບບໄວຫນຸ່ມຂື້ນໃຫມ່ໃຈຮ້ອນ ເຮັດແລ້ວພາຍໃນອາທິດດຽວ ຄົງເປັນເພາະຄວາມພະຍາຍາມ ແລະເອົາຈີງເອົາຈັງຂອງລຸງກະບໍ່ຮູ້ ນັບຈາກວັນນັ້ນ ແລະຜົນງານອັນນັ້ນ ໄດ້ເຮັດໃຫ້ລຸງມີອາຊີບນີ້ເປັນຕົ້ນມາ. ສ່ວນຫມູ່ຜູ່ໄປຝຶກງານກັບບໍລິສັດ IBM ນັ້ນ ຄົງເຫັນຊ່ອງທາງຄ້າຂາຍ ດີກ່ວາເປັນມືອາຊີບ ຫມໍໄດ້ອອກໄປເປີດຮ້ານຂາຍເຄື່ອງຄອມພີວເຕີຣ ກາຍເປັນເຖົ້າແກ່ໃຫຍ່ເທົ່າທຸກວັນນີ້
ນິທານຂອງລຸງເລົ່າມາຮອດນີ້ ລູກຫລານຄົງພໍຈະສະຫລຸບໄດ້ແລ້ວວ່າ ຈາກໄວນັກຮຽນຄົນນື່ງ ທີ່ເດີນທາງເຂົ້າສາຍໄອທີ ດ້ວຍຄວາມຕັ້ງໃຈອັນສູງສົງ ບໍ່ຫມາຍຄວາມວ່ານັກຮຽນຄົນນັ້ນ ຈະໄປຕາມເສັ້ນທາງທີ່ເຄີຍສາບານເອົາໄວ້. ລຸງທົບທວນເບີ່ງແລ້ວ ຈາກວັນທໍາອິດ ທີ່ມະຫາວິທະຍາໄລ ຂະແຫນງໄອທີ ມີນັກຮຽນເກືອບ 200 ຄົນ ເຖີງປີສຸດທ້າຍເຫລືອບໍ່ຮອດ 50 ຄົນ ພໍຈົບອອກມາ 40 ຄົນ ມີບໍ່ຮອດ 10 ຄົນ ທີ່ໄດ້ເຮັດວຽກກ່ຽວກັບຂະແຫນງທີ່ຮຽນມາ ທີ່ເວົ້າມານີ້ບໍ່ຫມາຍຄວາມວ່າ 200 - 10 = 190 ຄົນ ເປັນຂີ້ເຫຍື້ອ ໄຮ້ຄຸນຄ່າ ຄວາມຈີງແລ້ວບາງຄົນ ພໍຮຽນໄປແລ້ວ ຮູ້ວ່າບໍ່ແມ່ນສີ່ງທີ່ໂຕເອັງຫມັກ ຫລືບໍ່ກະມີທາງເດີນຊີວິດໃຫມ່ ອອກໄປເຮັດທຸລະກິດ ຄ້າຂາຍກະມີ ສ້າງຄອບຄົວກະມີ ຫລືໄປລົງຮຽນຂະແຫນງໃຫມ່ກະມີ ແລະຜົນສໍາເລັດຂອງຄົນເຮົາ ມັນບໍ່ໄດ້ວັດແທກກັນຢູ່ທີ່ໃບປະກາດ ຫລືຫນ້າທີ່ຕໍາແຫນ່ງ ເທົ່ານັ້ນ.
ລຸງໃຊ້ຊີວິດຢູ່ກັບອາຊີບໄອທີ ມາຫລາຍປີສົມຄວນ ເຄີຍຮ່ວມງານກັບທີມງານ ຂອງລາກຫລາຍບໍລິສັດ ທັງໃນແລະຕ່າງປະເທດ ເຫັນລິດເດດທັງລະດັບຊຽນ ແລະລະດັບສຸດຊ້ວຍ, ໃນວົງການໄອທີບໍ່ມີໃຜກ້າອ້າງໂຕວ່າເປັນຊຽນ ເພາະເທັກໂນໂລຊີມັນປ່ຽນໄປເລື້ອຍໆ ຊຽນໃນວັນນີ້ ອາດເປັນພຽງລຸງສາໃນມື້ຫນ້າ ແຕ່ສີ່ງນື່ງທີ່ເຂົາຍັງໃຫ້ຄວາມສໍາຄັນ ຄືປະສົບປະການ ເທັກໂນໂລຊີສາມາດຮຽນຮູ້ໄດ້ ແຕ່ປະສົບການ ມັນຄືການສະສົມ ໂດຍໃຊ້ເວລາແລະເຫດການ (ກາຣະເທສະ) ຊື່ງຊື້ຂາຍກັນບໍ່ໄດ້. ຢູ່ຕ່າງປະເທດ ທຸກໆເທື່ອທີ່ມີການສໍາພາດ ເພື່ອຮັບເອົາພງໄອທີໃຫມ່ ເຂົາຈະບໍ່ໄດ້ເບີ່ງທີ່ໃບປະກາດວ່າຈົບຈາກໃສ ສູງເທົ່າໃດ ທີ່ເຂົາຕ້ອງການຄືປະສົບການ ໃນດ້ານທີ່ເຂົາຕ້ອງການ ສຸດທ້າຍເຂົາຈະເບີ່ງທີ່ ບຸກຄະລິກຕະພາບ ນິໃສໃຈຄໍ ປະຫວັດການເຮັດວຽກດີ ມີຄວາມຊື່ສັດ ແລະຈະສາມາດ ເຮັດວຽກເປັນທີມນໍາເຂົາໄດ້ຫລືບໍ່
ລຸງເຄີຍໄດ້ຍີນເລື່ອງເຫລົ່າວ່າ ດົນນານມາແລ້ວ ທີ່ຕ່າງປະເທດມີໂຄງການສ້າງລະບົບໄອທີນື່ງ ທີ່ໃຫຍ່ແລະໃຊ້ທືນມະຫາສານ ມີ ພງ ໄອທີ 400 ຄົນເຮັດວຽກໃນໂຄງການນັ້ນ ແຕ່ເກີດເລື່ອງ ມີ ພງ ຄົນນື່ງຂາດວິໄນ ຈົນຖືກໄລ່ອອກການ ແຕ່ເລື່ອງມັນບໍ່ຈົບທີ່ການໄລ່ອອກ. ພງ ຄົນນັ້ນກ່ອນຈະຫນີອອກໄປ ໄດ້ເຮັດໄວຣັສໃສ່ລະບົບ ທີ່ສ້າງໄດ້ກາຍເຄີ່ງແລ້ວ ໂດຍບໍ່ມີໃຜຮູ້ ແລະແກ້ໄຂບໍ່ໄດ້ ຕ້ອງໄດ້ຮື້ໂຄງການ ເລີ້ມຕົ້ນໃຫມ່ ດ້ວຍທືນ 2 ມະຫາສານ. ກາຍເປັນຕໍານານ ອຸທາຫອນ ເຫລົ່າຕໍ່ໆກັນມາໃນວົງການໄອທີ.
ເທົ່າທີ່ລຸງຮູ້ມາ ອາຊີບໄອທີເປັນອາຊີບທີ່ສ້າງລາຍໄດ້ສູງອາຊີບນື່ງ ຂື້ນກັບຫນ້າວຽກແລະປະສົບການ ແຕ່ກໍ່ເປັນອາຊີບທີ່ຕ້ອງໃຊ້ເວລາ ແລະຄວາມຄິດຢູ່ກັບວຽກ ຈົນບາງເທື່ອລື່ມແລງລື່ມງາຍກໍ່ມີ ເປັນອາຊີບທີ່ຕ້ອງຮຽນຮູ້ຢູ່ເລື້ອຍໆ ໂດຍສະເພາະ ຜູ່ທີ່ຈະເປັນໂປຼກຣາມເມີຣ ຫລືນັກສ້າງຊອບແວຣໄດ້ ສ່ວນຫລາຍແລ້ວ ຕ້ອງເປັນຜູ່ທີ່ມີຄວາມອົດທົນສູງ ໃຈເຢັນແລະຮອບຄອບ. ຕາມທີ່ລຸງເຫັນ ສ່ວນຫລາຍແລ້ວອາຊີບ ນັກຂຽນໂປຼກຣາມ ຈະບໍ່ຍື່ນຍົງ ພໍຢູ່ກັບວຽກນີ້ດົນໆໄປ ຈະເຮັດໃຫ້ເກີດໂຣກຄວາມຄຽດ ບໍ່ຕ່າງຫຍັງກັບອາຊີບນັກຕະຫລາດຮຸ້ນ ທີ່ສະຫມອງເຮັດວຽກຫນັກເກີນໄປ ຫລືບໍ່ກະເກີດຄວາມກົດດັນຈາກວຽກ ທີ່ຕ້ອງເຮັດໃຫ້ແລ້ວທັນເວລາທີ່ກໍາຫນົດໄວ້. ຢູ່ເມືອງນອກ ລຸງບໍ່ຄອຍເຫັນພວກຄົນຫົວແດງ ຍຶດຖືອາຊີບນີ້ ສ່ວນຫລາຍເປັນອາຊີບ ຂອງຄົນເອຊີ ອີນເດຍ ທີ່ນິຍົມກັນຫລາຍ.
ລຸງຍັງຈື່ໄດ້ວ່າ ສະໄຫມທີ່ລຸງເຮັດວຽກກັບບໍລິສັດນື່ງ ທີ່ຕ່າງປະເທດນັ້ນ ວັນນື່ງລຸງນັ່ງເຮັດວຽກຈົນຮອດເຈັດໂມງແລງ ເປັນຊ່ວງທີ່ ພງ ທໍາຄວາມສະອາດ ເຂົ້າມາທໍາຄວາມສະອາດພໍດີ ເປັນຄົນຜີວຂາວສູງໃຫຍ່ ບໍ່ຄືຄົນທໍາຄວາມສະອາດເລີຍ ລຸງທໍາຄວາມຮູ້ຈັກສະບາຍດີ ລົມກັນໄປກັນມາ ເຖີງໄດ້ຮູ້ວ່າ ເມື່ອອາດີດ ລາວເຄີຍຍຶດຖືອາຊີບໄອທີມາກ່ອນ ພໍລຸງຖາມວ່າເປັນຫຍັງຈື່ງປ່ຽນອາຊີບມາເຮັດອານາໄມ ລາວຕອບວ່າ ເຮັດໄດ້ຫລາຍປີແລ້ວເບື່ອ ຕອນນີ້ມາຊື້ທຸຣະກິດນ້ອຍໆ ຮັບທໍາຄວາມສະອາດຕາມຫ້ອງການ ສະບາຍກ່ວາ ພໍໃຈກະເຮັດບໍ່ພໍໃຈກະບໍ່ເຮັດ ເກັບເງີນໄດ້ພໍ ໄປຮໍລີເດ ຢູ່ໄທຍແລນ ຄັກຫລາຍ. ຕອນນັ້ນລຸງເອັງກະຍັງຄິດບໍ່ອອກວ່າ ເປັນຫຍັງຄົນເຮົາ ຈື່ງປ່ຽນແປງຊີວິດໂຕເອັງໄດ້ ຈາກຫນ້າມືເປັນຫລັງມືແນວນີ້ ອັນນີ້ບໍ່ທີ່ເຂົາວ່າ ຄົນໃນຢາກອອກ ຄົນນອກຢາກເຂົ້າ.
ທີ່ລຸງເຫລົ່າມາ ບໍ່ແມ່ນໃຫ້ພວກລູກຫລານຢ້ານອາຊີບໄອທີ ທຸກອາຊີບມີຍາກມີງ່າຍແລະຜົນປະໂຫຽດທັງນັ້ນ ຖ້າລູກຫລານຍັງຢືນຢັນວ່າມັກອາຊີບນີ້ ຫລືຕ້ອງການຮຽນຮູ້ຫລີ້ນໆ ເພື່ອປະດັບຄວາມຮູ້ ຢາກຮູ້ວິທີ່ຝຶກຝົນ ເລີ້ມຕົ້ນຮໍ່າຮຽນແນວໃດ ລຸງຈະບອກໃຫ້ ຕາມເທົ່າທີ່ລຸງພໍຮູ້ມາດັ່ງນີ້ ໂຊກດີທີ່ສະໄຫມນີ້ການຮໍ່າຮຽນ ເລື້ອງໄອທີ ບໍ່ໄດ້ໃຊ້ທືນຫລາຍຄືແຕ່ເກົ່າ ການຮໍ່າຮຽນກະບໍ່ໄດ້ຈໍາກັດອາຍຸ ວັນນະ ຫລືຕ້ອງມີຮ່າງກາຍສົມບູນ ໂກ້ເກ ງົດງາມ ຄືອາຊີບ ສາວອາກາດລາວ, ແຕ່ມີສີ່ງນື່ງ ທີ່ລຸງເຫັນວ່າມີຄວາມຈໍາເປັນ ຄືພາສາອັງກິດ ຕ້ອງພໍອ່ານອອກຂຽນໄດ້ ແມ່ນຈະຊ່ອຍໃຫ້ເຮົາໄປໄດ້ໄວຂື້ນ ເພາະພວກເຮົາຮຽນເທັກໂນໂລຊີຂອງເຂົາ ຈໍາເປັນເຮົາຕ້ອງໄດ້ເວົ້າຄວາມເຂົາ ວັນນື່ງຂ້າງຫນ້າລຸງເຊື່ອວ່າ ພາສາຈະບໍ່ແມ່ນບັນຫາຂອງມະນຸດ ທີ່ຈະສາມາດສື່ສານກັນໄດ້ຫມົດເຊື້ອຊາດ.
ການຮຽນຮູ້ຂັ້ນພື້ນຖານ ຮຽນດ້ວຍໂຕເອັງ ຄວນຈະຕ້ອງເລີ້ມຈາກຕໍາລາຫນັງສື ຫລືທາງອີນເຕີຣເນັດ ແມ່ນມີໃຫ້ເລືອກຢ່າງຫລວງຫລາຍ, ການຮໍ່າຮຽນຈາກຫມູ່ຄູ່ ຜູ່ທີ່ເກັ່ງແລ້ວກະເປັນອີກວິທີນື່ງທີ່ໄດ້ຜົນ ແລະພໍເຮົາເລີ້ມມີຄວາມຮູ້ຂັ້ນພື້ນຖານແລ້ວ ຕ້ອງການຮູ້ໄປໄກກ່ວານັ້ນ ຈໍາເປັນຈະຕ້ອງໄດ້ຮຽນໄປຕາມຫລັກສູດ ຄໍາວ່າຫລັກສູດນີ້ ລຸງບໍ່ໄດ້ຫມາຍຄວາມວ່າ ຈະຕ້ອງໄປນັ່ງຮຽນ ຢູ່ຕາມສະຖາບັນເຖີງຈະຖືກຕ້ອງ ສະໄຫມນີ້ການຮຽນການສອນ ໂດຍສະເພາະດ້ານໄອທີ ແມ່ນສາມາດຮຽນໄດ້ທາງອີນເຕີຣເນັດ ແລະຍັງສາມາດຮຽນໄດ້ດ້ວຍໂຕເອັງອີກ ໃນຫລັກສູດເຂົາຈະມີ ຄໍາແນະນໍາ ໄວ້ຢ່າງລະອຽດ ຖ້າບໍ່ເຂົ້າໃຈກໍ່ສາມາດສອບຖາມກັນໄດ້ ຫລືບໍ່ຊັ້ນ ພຽງພີມບັນຫາໃສ່ ກູໂກ ເຮົາກໍ່ຈະເຫັນຄໍາຕອບຂື້ນມາເຕັມ.
ການທີ່ເຮົາຮຽນຈົບຫລັກສູດໃດນື່ງ ຈະເປັນປະຣີນຍາໂທ ຫລືເອກ ຈາກອາເມຣິກາ ຫລືມຊ ນັ້ນບໍ່ໄດ້ຫມາຍຄວາມວ່າເຮົາດີເລີດ ສຸດຍອດແລ້ວ. ຢູ່ຕ່າງປະເທດເຂົາຖືນັກຮຽນທີ່ຈົບອອກມາໃຫມ່ ຄືກັບຫນ່ວຍໄຂ່ໃຫມ່ໆ ກ່ອນຈະເປັນໄກ່ໄດ້ ຕ້ອງຜ່ານການຟູມຟັກ ຮຽນຍາງຮຽນບີນກ່ອນ ຄືກັບປະສົບການທີ່ລຸງໄດ້ເຫລົ່າມາຂ້າງເທີງນັ້ນ. ເວົ້າຕາມຄວາມຈີງ ສີ່ງທີ່ລຸງເຄີຍຮໍ່າຮຽນມາ ໃນມະຫາວິທະຍາໄລ ເກືອບເວົ້າໄດ້ວ່າ ບໍ່ສາມາດເອົາມາໃຊ້ກັບຊີວິດ ການເຮັດວຽກໂຕຈີງໄດ້ເລີຍ ມັນເປັນພຽງພື້ນຖານໃຫ້ເຮົາປັບໂຕ ເພື່ອຮໍ່າຮຽນເອົາວິຊາການໃຫມ່ເທົ່ານັ້ນ.
ຫລານໆຄົງຢາກຖາມວ່າ ແລ້ວຈະເຮັດແນວໃດໃນເມື່ອຈົບອອກມາແລ້ວ ຢາກເຮັດວຽກທີ່ຮຽນມາ ແຕ່ຍັງບໍ່ມີປະສົບການ ໄປສະມັກວຽກທາງໃດ ເຂົາກະຖາມເອົາແຕ່ປະສົບການ, ລຸງຈະບອກເຄັດລັບໃຫ້ໃນບົດຫນ້າ ເອົາແບບສະບັບຂອງລຸງ.
ສໍາຫລັບວັນນີ້ ລຸງໂມ້ໄປຫລາຍແລ້ວ ຮູ້ສຶກສົ້ມປາກ ຂໍເວລາໄປຊົດເບຍລາວເຢັນໆຈັກອຶກນື່ງກ່ອນ
ແລ້ວພົບກັນໃຫມ່
ไม่มีความคิดเห็น:
แสดงความคิดเห็น